سدھی جمہوریات بارے چرچہ تیز

دلی وچ عامَ آدمی پارٹی دی جت اتے سرکار بنن نال سدھی جمہوریات بارے وچار وٹاندرا اتے بحث وی تیز ہو گئی ہے۔ ٹی وی چینلاں اتے میڈیا وچ ایہہ چرچہ ہر روز کسے نہ کسے روپ وچ ہو رہی ہے۔ لوکاں وچ وی ایہہ چرچہ ودھ رہی ہے تے لوک بنیادی سوال پچھ رہے ہن کہ اس دیش دا مالک کون ہے؟ لوک، کہ کوئی ہور؟ لوک سوال اٹھا رہے ہن کہ موجودہ لبرل ڈیموکریسی لوکاں دے حقاں تے سٹّ مار رہی ہے۔ ہن چرچہ چھڑ پئی ہے کہ ایہدا متبادل سدھی جمہوریات کس طرحاں عمل وچ لیاندی جا سکدی ہے۔

نمائندہ طرز دی موجودہ جمہوریات توں عامَ لوک دکھی ہن اتے اکّ چکے ہن۔ ہندوستان وچ ہی نہیں بلکہ دنیا دے بہتے ملکاں وچ لوک اس دا متبادل لبھّ رہے ہن۔ لبرل ڈیموکریسی وچ لوکاں نوں صرف ووٹ پاؤن والا اک اجڑ سمجھیا جاندا ہے اتے اوہناں دا سماج اتے دیش دے فیصلیاں وچ کوئی حصہ نہیں ہندا۔ ایہہ دلیل دتی جاندی ہے کہ لوکاں نے ووٹاں پا دتیاں ہن جس نال جتی ہوئی دھر نوں پنج سال منمرضی نال راج کرن دی منظوری مل گئی ہے اتے اگلیاں چوناں تکّ کسے وی فیصلے وچ ووٹراں دی رائے جانن دی کوئی لوڑ نہیں۔ چنے ہوئے نمائندے چاہے جو مرضی کرن اوہناں اتے لوکاں دا کوئی کنٹرول نہیں ہو سکدا۔ اصلیت ایہہ ہے کہ لبرل ڈیموکریسی وچ چوناں دی ورتوں لوکاں دے ہتھ وڈھن لئی کیتی جاندی ہے۔ چوناں دے بعد لوک بالکل بے زار ہو جاندے ہن اتے اوہ کجھ وی نہیں کر سکدے۔

پر حاکم ٹولے نوں ایہہ پرنالی بہت ہی راس ہے۔ وڈے سرمائیداراں دا لانا اپنیاں پارٹیاں راہیں پیسے اتے ڈنڈے دے زور نال چوناں وچ اپنے حمایتیاں نوں جتا کے عامَ لوکاں نوں کھڈے لا کے رکھدے ہن۔ چوناں بعد سرکار اتے ریاست حاکم ٹولے دا ہی پکھ پوردے ہن۔ لوکاں دی کسے وی فیصلے وچ کوئی رائے نہیں لئی جاندی۔ کانگرس، بھاجپا، سی پی آئی (ایم) اتے کئی ہور پارٹیاں والے سدھی جمہوریات خلاف دلیل دے رہے ہن کہ عامَ لوکاں نوں راجتنتر اتے ریاست دے کماں بارے پتہ نہیں ہندا اس لئی اوہناں دے ہتھ وچ طاقت اتے پربھتا خطرناک ہوویگی۔ سدھے لوکتنتر نوں اوہ بھیڑ دا راج کہندے ہن۔ اوہ کہندے ہن کہ لبرل ڈیموکریسی ہی ساریاں نالوں ودھیا سیاسی پرنالی ہے۔
 
دلی وچ عامَ آدمی پارٹی نے اس پرنالی نوں چنوتی دتی ہے۔ عامَ آدمی پارٹی دی جت اتے دلی وچ سرکار بناؤن بارے لوکاں دی رائے لین نال اک نویں ریت دی شروعات ہوئی ہے۔ اس نال سدھی جمہوریات بارے اتے اہم فیصلیاں وچ لوکاں دی رائے لین بارے چرچہ گرم ہو گئی ہے۔ دلی دیاں چوناں اتے عامَ آدمی پارٹی دے سٹینڈ توں پہلاں ایہہ بحث اتے سوچ کجھ چھوٹے دائریاں تائیں محدود سی۔ پر ہن ایہہ بحث کھلھ کے سماج اتے سیاست دی مکھدھارا وچ چرچہ دا وشا بن گئی ہے۔

عامَ آدمی پارٹی دا وعدہ ہے کہ اوہ ہر اہم فیصلہ لوکاں دی رائے نال ہی کریگی۔ کانگرس، بھاجپا اتے حاکم ٹولے دیاں ہور پارٹیاں اک پاسے تاں عامَ آدمی پارٹی دا مخول اڈا رہیاں ہن اتے کہہ رہیاں ہن کہ عامَ آدمی پارٹی وی اوہناں وانگ ہی اپنے وعدے تے نہیں ٹکیگی۔ دوجے پاسے بڑی بے شرمی نال ایہہ وی کہہ رہیاں ہن کہ اوہ تاں ہمیشہ ہی لوکاں دی رائے ہی لے کے ہر کم کردیاں ہن۔ پر لوک سچائی توں واقف ہن۔ سدھی جمہوریات بارے چل رہی بحث لوکاں دے حقاں لئی چل رہے گھولاں لئی بہت ہی لاہے وند ثابت ہوویگی۔